Seán sa cheo, ríl

Scríobhadh an ceol seo ón bhfidléir Niallaí Ó Baoill (Néillidh Boyle), Cró na Sealg, An Clochán Liath. Bhí Séamus Ennis cairdiúil le Niallaí agus bhailigh cuid mhór ceoil uaidh nuair a bhí sé ar obair pháirce. Scríobh sé sa dialann (8.3.1944) go mba rud fíor-spéisiúil faoi cheolta Niallaí gur ‘óna mháthair a fuair Niall iad – ‘na bpoirt béil aici a bhíodar’. Neansa Nic Suibhne a bhí ar a mháthair agus ba ó An Chruit í. Scríobh Ennis an t-eolas seo freisin le hathscríobh an cheoil do ‘Seán sa Cheo’, an dara ceann de dhá phíosa a scríobh sé ó Niallaí tús Márta 1944. Tá tóir ag ceoltóirí Dhún na nGall ar ‘Seán sa Cheo’, agus tá sé an-fheiliúnach do sheinm ochtaigh ar gné thábhachtach i gcónaí é i gceol fidléireachta Dhún na nGall.