Castlefinn, ríl

Thug Séamus Ennis cuairt ar Niallaí Ó Baoill, Cró na Sealg, An Clochán Liath nuair a bhí sé ar obair pháirce i nDún na nGall.  Ba mhinic iad ag seinm ceoil le chéile agus ag comhrá  agus i gcónaí bheadh ceolta éigin scríofa ó Niallaí ag Ennis agus é ag fágáil. Tá ‘The Castlefinn Reel’ ar cheann de dhá ríl a d’athscríobh Ennis ó fhidléireacht Niallaí tús Márta 1944.

Is iondúla an t-ainm ‘The Humours of Castlefinn’ air agus tá fáil air in Ceol Rince na hÉireann 1 (No. 186). Rinneadh é a thaifeadadh faoin ainm ‘Egan’s Reel’ ar cheann de na chéad fadcheirníní de cheol tradisiúnta All Ireland Champions Violin (1959) ar a bhfuil Paddy Canny, P.J. Hayes, Peadar O’Loughlin agus Bridie Lafferty. Samhlaítear go mór é freisin le seinm Tony MacMahon agus Noel Hill a thaifeadaigh é don chéad traic ar an albam I gCnoc Na Graí (1985).

San athscríobh, scríobh Ennis: ‘Dhá ríl a scríobhas ó Niall Ó Baoill (c.50) veidhleadóir, An Clochán Liath (gan ainm) (Castlefinn Reel) 3.3.44 agus mé aríst aige .’