Tiúin bháthadh Phrochlais, port

Tá roinnt mhaith cuntas i mBailiúchán na Scol, Cnuasach Bhéaloideas Éireann a bailíodh sna 1930í faoi Bháthadh Phroclaisc in 1813. An 12 Bealtaine an bhliain úd bhí foirne móra iascairí ina raibh fir ó Theileann agus ó Chill Charthaigh amuigh i mBá Phroclaisc ar thóir scadán. Shéid an stoirm gan choinne, iompaíodh na báid ar fad agus báthadh os cionn ceithre scór fear. Dúirt Pheadar Ó Beirn, agus é ag caint le Séamus Ennis faoin tubaiste, gur chualathas píobaire an oíche sin agus an píosa ceoil sin á sheinm aige, ceol a dtugtar ‘Báthadh Phroclaisc’ riamh ó shin air.  Tá leagan den phort seo agus an t-ainm ‘Carbray’s Frolics’ air in The Dance Music of Ireland (Uimh. 407) ag O’Neill.