Mairéad Ní Mhaonaigh (Máire Ní Bheirn agus Peadar Ó Beirn)

Mairéad Ní Mhaonaigh, ag casadh 2 amhrán a bhailigh Séamus Mac Aonghusa i nDún na nGall ó Mháire Ní Bheirn agus ag seinm 2 phort bailithe i nDún na nGall ó Pheadar Ó Beirn

Máire Ní Bheirn

Bealach Bhun Ghlas, An Charraig. Tugadh Clann Johnny Johndy Ó Beirn orthu. Bhí Máire, Peadar, agus Condy ann. Fuair Máire bás in 1976 in aois 78. Bhí an teach tógtha ar idirthalamh, idir Iomaire Mhuireanáin agus An Cheapach Uachtarach.

Peadar Ó Beirn (1900–c. 1950)

Bealach Bhun Ghlas, An Charraig. Ba deartháir é Peadar le Máire Ní Bheirn. Ag díol éisc a shaothraíodh Peadar a shlí bheatha. Bhí asal agus cairt i dtosach aige agus i gcionn ama cheannaigh sé capaillín agus bhí an-bhród air as. I ngeall ar fhiosrú faoi fhonn do dhráma raidió , rinne Ennis cóip den fhonn ‘Tiún Thaibhse Chonaill’ agus den údar focal ar fhocal mar a fuair sé ó Pheadar iad agus aistriúchán (Féach CBÉ 1296:292).

Cé nár thug Ennis cuairt ar Mháire agus ar Pheadar ach cúpla uair i Meán Fómhair 1943, scríobh sé an-chuid ábhair uathu. Bhí an bailitheoir béaloidis, Seán Ó hEochaidh in éineacht le Ennis nuair a chuaigh sé fhad leo ar an 14 Meán Fómhair, 1943: ‘Chromas ar scríobh go dtí a haon déag agus ansin chuamar go dtí teach Mháire agus Pheadair, de mhuintir Uí Bheirn, agus scríobhas giotaí ceoil, poirt, agus amhráin go dtí a cúig ar maidin!’

An lá dar gcionn bhí seisiún deireanach eile aige ag bailiú uathu, faoi mar a scríobh sé: ‘Chuamar ar ais ar a haon déag go teach Uí Bheirn agus scríobhas poirt agus araile ó Pheadar agus ó Mháire go dtí a trí ar maidin.’